Una lectura pa Riopedre

Milio Rodríguez Cueto

La Nueva España, 2019/10/11

1. Nun me presta l’ingresu en prisión de José Luis Iglesias Riopedre. A fin de cuentes, ye la constatación, otra vez más, del fracasu de la condición humana. Ente director xeneral, viceconseyeru y conseyeru, Riopedre fue xefe míu una bona partida de cursos escolares. Dexando irregularidaes económiques pa un llau (que nun ye poca cosa), hai que decir que los (y les) hubo nel cargu bastante peores: polo menos, en tiempos d’él, la confusión burocrática y les fataes de la corrección política del sistema educativu nun llegaben a les dimensiones godzillianes actuales. Una vez, va cuantayá, coincidimos na presentación d’unos llibros n’asturiano. Charremos un ratiquín y, como ye gallegu, por cortesía, llevé la conversación pa les lletres vecines. Pa mi, de Rosalía de Castro pa esta parte, la literatura en llingua galaica reduzse a Cunqueiro: lo demás fáiseme aburridísimo, davezu afogao pola carga d’unes bones intenciones banales, cándides, coyunturales… como tamién pasa equí. Asina que, digo, yo emponderé, incondicionalmente, la fértil imaxinación de Cunqueiro. Acuérdome qu’él quedó un momentín varáu, pensatible, y entós sacó a cuentu a Méndez Ferrín. Algo dio a entender de que lu conocía en persona (la ciudá de Vigo o los estudios de Filosofía podíen ser la conesión) y defendiólu como la gran figura literaria de la so tierra. A mi nun me cayó embaxo aquella reivindicación. Méndez Ferrín ye’l típicu escritor diesel: nun tien reprís. Los méritos de Méndez Ferrín, pa quien-y los alcuentra, tienen más que ver cola fidelidá al galleguismu d’izquierdes, cola militancia. Don Álvaro, en cambiu, como bien sabemos, ensin dexar de ser galleguista, tiraba a fachuca, con perdón. Pues ellí tábemos: el nietu d’un represaliáu por Franco defendiendo a un periodista conservador que pasó pela Falange y, enfrente, un clérigu dominicu (que yo sepa, el sacramentu ye indeleble) aprofiando a favor d’un miembru del Partido Galego do Proletariado, depués Galicia Ceibe: ¡qué inconsecuencia, el mundu al revés! 

Entós, mientres calteníemos tovía’l debate, diome por pensar que, en realidá, Riopedre nun lliere a ningún de los dos: nin a Méndez Ferrín nin a Cunqueiro. Diome por pensar que sabía d’ellos y de les sos filiaciones, claro, pero la biografía política que se fuere construyendo etapa a etapa, curva a curva nel camín de la vida, condicionábalu a la hora de declarar una preferencia que nun podía ser puramente estética, d’acuerdu con otru de los grandes dogmas socio-culturales de la so quinta: arte y compromisu de la mano. Agora que ta presu, va vaga-y pa lleer y a mi ocurrióseme manda-y dalgo de Cunqueiro, pa reconcilialos. De les tres noveles qu’escribió don Álvaro en gallego, la más consoladora pa un prisioneru digo yo que será Si o vello Sinbad volvese ás illas (Si’l vieyu Sinbad volviere pa les isles), que pinta l’anchu mundu en tolo que da en paralelos y meridianos, y la llibertá del viaxeru a la sombra d’un mástil y una vela. Esi llibru ye’l que-y diba mandar a la celda de Villabona pero, al abrilu, zapiqué con una frase, ya pa escontra’l final, na qu’un demónganu marutáu quitá’l disfraz y resopla, descansáu: “¡Xa me tardaba quitarme as roupas de muller!” Y pensé que non, qu’esta lectura nun yera la más conveniente pa él nes circunstancies actuales porque, en vez de distraelu na desgracia, igual-y facía más presente alguna subordinada compliz, tamién condenada.

2. Un paisanu que s’apellida Domecq acusa al capitalismu y a los antitaurinos de connivencia, y otru que s’apellida Smith reivindícase como intérprete históricu del patriotismu español. ¡Vaya dos! Fáennos consecuentes a Riopedre y a mi.