Aruelu. com
Diariu Dixital Independiente
01/06/10
En proporción al númberu de diputaos, al PSOE toquen-y 2,20 millones, al PP 2,09 y a IU-BA-LV 420.000 euros, anque’l braeru repartu caltiense en secretu ente la opinión pública.
El Presupuestu del Principáu d’Asturies asoleya pa esti añu un total de 4.710.000 euros pa pagar gastos de los grupos parlamentarios (2.500.000 euros) y sueldos de diputaos (2.210.000 euros).
Los 2.500.000 euros que correspuenden a los tres grupos parlamentarios esistentes na Cámara son una sovención pa gastos propios (asesoramientu y contratación d’una persona por cada grupu), ensin incluyir los gastos corrientes (máquines, material de oficina, teléfonu, lluz, etc), que-yos paga la propia Xunta Xeneral. Estes cantidaes, a toes lluces descomanaes, tan xustificaes nel reglamentu de la Cámara p’atender los gastos de los grupos parlamentarios, dalgo que nun se correspuende cola realidá. La verdadera esplicación del destin d’esti dineru dála paradoxicamente la Llei de Financiación de los Partíos Políticos, que recueye les sovenciones a los grupos parlamentarios como una vía de financiación de los partíos políticos.
Daque asemeyáo pasa colos 2.210.000 euros destinaos a sueldos de los diputaos. Ye conocío q’una parte d’esti dineru acaba tamién nes arques del partíu, porque toos los diputaos del PP y del PSOE dan un porcentaxe del so sueldu al partíu. Nel casu de la coalición IU-BA-LV los cuatro diputaos dan el so sueldu completu a la coalición y dempúes IU-BA-LV da-yos el quivalente a lo que ganaríen nel so trabayu anterior. Na Xunta hai 34 diputaos con dedicación esclusiva, que cobren 14 pagues con un mínimu de 3.913 euros cauna. Ente ellos tan dellos diputaos del PSOE y del PP y los cuatro de la coalición IU-BA-LV. Esta cantidá va vese rebaxada en 500 euros “p’apretase’l cinturón” según ellos mesmos manifiesten, anque nada se sabe sobre cuando va a entamar la rebaxa.
Pero los partíos de la Xunta tienen un pautu de silenciu total sobre los criterios de repartu d’esti dineru públicu ente los cuatro partios con representación nel parlamentu, y nada se sabe tampoco como reparte la coalición IU-BA-LV la so asignación ente los tres miembros de la mesma. Y por supuestu, tampoco se conoz cuales son los gastos reales de los grupos parlamentarios y cuanto ye’l dineru “sobrante” que va a parar a los sos partíos respectivos, anque ye probatible que seya la mayor parte d’estes cantidaes. Pero, en too casu, ya se sabe qu’ellos mesmos aprobaron la Llei de Financiación de Partíos que los protexe nesi sen.
A falta d’estes informaciones que nun se dan a los ciudadanos, lo cierto ye que si esos 4.710.000 euros que-yos pagamos los asturianos se repartieren ente los tres grupos parlamentarios según el númberu de diputaos, el grupu del PSOE (21 diputaos) atroparía 2,20 millones d’euros en 2010, el grupu del PP (20 diputaos) 2,09 millones y la coalición IU-BA-LV (3 diputaos d’IU y un diputáu del BA), 420.000 euros.
Por último, si daquien quier saber porqué se destinen 2.210.000 euros a pagar los sueldos de los diputaos, esta ye la curiosa desplicación: “para evitar su posible dependencia de personas o grupos ajenos que pudieran condicionar su libertad”, según asoleya na páxina web de la “Junta General del Principado”.
No hay comentarios:
Publicar un comentario