CONTACTO

cofpas@gmail.com
@cofpas

lunes, 8 de junio de 2009

A LA CONSEYERÍA D´ALMINISTRACIONES PÚBLIQUES Y VOCERA DEL GOBIERNU

Comisión de Revisión del Siguimientu de l’Actividá Profesional.


Xurde Blanco Puente, Lletráu del Serviciu Xurídicu de l’Alministración del Principáu d’Asturies, con domiciliu pa notificaciones nel so puestu de trabayu, persónase y DIZ:
Que pente medies del presente escritu amuesa la so indignada disconformidá cola valoración que de la so actividá profesional se fai nun denomáu resume de la mesma, documentu datáu a 7 d’abril y apurríu en mano el pasáu día 4 de mayu, con sofitu nes consideraciones darréu:
1ª.- Nun ye de recibu la puntuación de cero nel separtáu de “Orientación al llogru y cumplimientu d’oxetivos. Oxetivos coleutivos”, por cuanto los propios del conxuntu del Serviciu Xurídicu son los marcaos nel Decretu 20/97, de 20 de marzu, pol que se regula la organización y furrulamientu del mesmu, y toos ellos, ensin esceición, cumpliéronse a cabalidá (un 75% de pleitos ganaos) xustamente nun añu nel que la plantiya de Lletraos nun algamó, en dengún de los sos meses, les tres quintes partes de los efeutivos previstos na rellación de puestos de trabayu y el Personal de Secretaría careció de problemes asemeyaos. Poro, nesti separtáu la calificación de toos y caún de los funcionarios, Lletraos y Personal de Secretaría, debió ser de 10.
Cosa distinta ye que quien fizo les funciones (en comisión) de Xefe de Serviciu nun se ficiere cargu de la obligación (si ye que la tenía) de facer una programación con oxetivos más p’alló de los marcaos nel Decretu, asuntu esti qu’amás d’abultar chambón -porque chambonada ye l’andar corrixendo Decretos al endefechu- si a daquién tien de perxudicar na valoración profesional sedrá al Xefe del Serviciu que nun cumplió les sos obligaciones y non a los funcionarios, Lletraos y Personal de Secretaría, que dengún pitu tocaben neso.
2ª.- Los más de los separtaos fonon calificaos por un funcionariu, qu’anguañu desendolca interinamente’l puestu de Xefe del Serviciu Xurídicu, que me vien amosando un arispiu refugu personal pola mor, a lo qu’abulta, de la mio conocida disconformidá col so irregular asitiamientu alministrativu; el sofitu que-y paez dar a la duración de comisiones de serviciu que afeuten a los más de los Lletraos; y a la denuncia de dalgún escesu censor a la mio llibertá -y obligación- d’actuar profesionalmente acordies colos principios de llegalidá, oxetividá ya imparcialidá, circunstancies qu’esfronen escontra la obligación que tien l’Alministración d’aperiar sistemas d’evaluación oxetivos ya imparciales (artículu 20.3 de la Llei 7/2007, de 12 d’abril, del Estatutu Básicu del Emplegáu Públicu).
3ª.- La valoración rellativa a los cursos de formación recibíos nun toma en cunta que la Direición del Institutu Adolfo Posada seleiciona les demandes formatives ensin criteriu oxetivu dalu (polo menos conocíu), nin qu’en casos –que carecí- la unidá alministrativa torga la asistencia de los seleicionaos invocando “necesidaes del serviciu”. Poro, el recibir más o menos formación non siempre depende de la voluntá del funcionariu.
D’otra miente, nun hai información denguna sobro’l valir de los cursos. Por exemplu, si pa la valoración del desendolcu d’un Lletráu del Serviciu Xurídicu puntúa lo mesmu’l siguimientu provechosu del cursu “Pola to salú, ximiélgate”, que’l de “Llei de Contratos del Seutor Públicu”.
Y too ello nun casa col mandáu del mentáu artículu 20.3 del Estatutu Básicu del Emplegáu Públicu porque fallen los mínimos requisitos de tresparencia y oxetividá na ponderación d’esti separtáu.
4ª. Al cabu, partiendo de que la vía d’accesu a la participación como profesor o ponente nos cursos organizaos pel Institutu Adolfo Posada ye un secretu burocráticu bien guardáu -a lo menos pa min qu’enxamás fui convidáu pel mentáu Institutu a participar nesa llambiona xera formativa, siendo asina que, pel un llau, soi ún de los dos Lletraos de concursu con que cunta’l Serviciu Xurídicu y que, pel otru, los más de los cursos cinquen n’aspeutos nos que xuru podríen apurrise bien de coses de provechu dende’l trabayu diariu y per años énte Xulgaos y Tribunales- nun abulta mui acordies colos repetíos principios de tresparencia, imparcialidá y oxetividá que tendríen d’inspirar la valoración del desendolcu, un tercer pagu (nel dictáu de cursos cóbrase dos vegaes la xornada llaboral) al afortunáu (y rúxese que repititivu) profesoráu del Institutu Adolfu Posada, pente medies, nesti casu, d’una mayor valoración pa la so carrera horizontal.
Poro,
ENCAMIENTO: La debida consideranza de los razonamientos fechos a los efeutos oportunos.
ARRIENDES D’ELLO EN PRIMER LLUGAR MANIFIESTO: el mio deseyu de recibir toos y caún de los cursos de formación que resulten de valir pal exerciciu del puestu de Lletráu del Serviciu Xurídicu.
Y ARRIENDES D’ELLO EN SEGUNDU LLUGAR MANIFIESTO: la mio disposición a impartir toles clases que’l Institutu Adolfo Posada-y pete encargame, ensin más llende que los imperativos d’incompatibilidá, y, mesmamente, ensin otru pagu que nun seya’l llibramientu de la xornada de trabayu ordinaria.
ENCAMIENTO: Que se tomen en cunta les manifestaciones de suso magar que nun seya sinón pa l’aplicación analóxica, na valoración del mio desendolcu profesional, del principiu de “dase por cumplida”, reiteráu na base segunda de la Resolución d’esa Conseyería, de 20 de xunu de 2008, pa delles circunstancies ayenes a la voluntá del funcionariu.
N’Uviéu, a once de mayu de dos mil nueve.

No hay comentarios:

Publicar un comentario