En nome del socialismu obreru.

José María Estrada Janáriz

Si les pallabres «socialismu» ya «obreru» qu’apaecen nel nome del «Partido Socialista Obrero Español» fueren dalgo más qu’un nome, quedríen dicir que ye un partíu que llucha pol socialismu col envís d’acabar col sistema económicu dominante y, precisamente, por ello, tendría de tar del llau de los «obreros» o de los trabayadores, en xeneral.

Nun vamos facer agora una historia de lo que fizo l’autonomáu Partido Socialista Obrero Español dende poco más o menos la segunda metá del sieglu pasáu y lo que va d’esti, pues pue resumise como va darréu: conversión nun partíu capitalista más y, polo tanto, desdexación de los sos principios socialistes ya obreros. Asina, agora fala de «ciudadanos», d’«españoles», en cuentes de falar d’«obreros». Y esto nun ye inocente, pues los que tan al frente de les empreses capitalistes asitiaes n’España, casi toos son «ciudadanos españoles», pero nun son «obreros». D’esta manera, esi partíu ta diciendo que se pue trabayar al empar por un capitalista y por un obreru. Ensin comentarios.

Y esto vien a cuentu de lo que fai, nesta lóxica, esi partíu n’Asturies, que nun ye que nun tea a favor de los trabayadores, sinón que ta escontra d’ellos.

Una práutica que se repite con vezu n’Alministración asturiana, y dende va yá tiempu, ye la de contratar una y otra vegada a trabayadores pa facer el mesmu tipu de trabayu, como ye’l casu, por exemplu, de los «auxiliares educadores». A estos, contrátenlos pal primer trimestre del cursu; acaba’l contratu y llueu vuelven sacar otru contratu pal segundu trimestre ya otru más pal terceru. La función d’estos auxiliares, según yá tienen dicho un gran númberu de sentencies de la xurisdicción llaboral, ye l’atención direuta de los escolinos, el so treslláu, la vixilancia del comedor, aprende-yos bonos vezos de salú, alimentación, etc. Son, polo tanto y como tamién dicen los Xulgaos, «actividades normales y permanentes del organismo demandado». Pero entós ¿qué fai esta Alministración que ta nes manes d’un partíu que s’autonoma «socialista ya obreru»? Pues en cuentes de mirar polos derechos de los trabayadores y sacar les places a oposición (o creales sinón esisten), que ye lo que correspuende p’«actividades normales y permanentes», lo que fai son contratos, ún trés d’otru, por «acumulación de tareas». Pues bien, sobre esto, los Tribunales tienen dicho que «el organismo demandado tiene que ser perfectamente consciente y conocedor de que la utilización de este tipo de contrataciones en lo sucesivo constituye un fraude de ley que debe ser corregido de inmediato y que la continuación de esta práctica puede dar lugar a posteriores declaraciones de temeridad o mala fe con las consecuencias que en su caso puedan dar lugar». Como se ve, la crítica ye bien dura y acusa a l’Alministración de cometer «fraude de ley», o seya d’emplegar la llei a la so comenencia pa nun cumplir pa con otres obligaciones impuestes tamién pola llei; obligaciones que, de cumplise, supondríen derechos llaborales pa los trabayadores y que con esa forma de contratar nun se respeten. Lo de les «consecuencies» son les multes que pue’l Xuez poner a l’Alministración y que, claro, nun paga del so bolsu’l causante d’esta forma de contratar, sinón que la paga l’erariu públicu.

            Otros emplegaos públicos colos que s’usen métodos paecidos son los «valoradores de dependencia», onde la so causa de contratación tamién respuende a necesidaes normales ya permanentes de l’Alministración y, por ello, les sentencies de los Tribunales-yos son favoratibles..

Énte esta situación, el Direutor Xeneral de Función Pública, debería esplicar si:

- tramita les reclamaciones previes a la vía llaboral según afita la Llei y si dicta’l resolvimientu correspondiente.

- a la vista de les sentencies que van recayendo, considera qu’esiste dalguna posibilidá de que los Xueces y Tribunales dicten dalguna sentencia favoratible a la postura de la Direición Xeneral.

- nun caltién esta postura, magar que persabe que nun ye axustada a derechu, por qu’hai munchos trabayadores (quiciabes cientos) na mesma situación, o seya, que tan contrataos pa desendolcar necesidaes normales y permanentes de l’Alministración, y nun quier tener que reconoce-yos la so situación y los sos derechos hasta qu’una sentencia obligue a ello.

¿Y cuálos son esos derechos? Pues nin más nin menos que los que correspuenden a ser un emplegáu públicu de calter fitu o interín, lo que nel casu de los «auxiliares educadores» supón, amás, perda de vacaciones, salarios, cotizaciones a la Seguridá Social, etc.

Polo que sabemos, nun hai la menor traza de que vaya haber un cambéu nesta forma de machucar los derechos de los trabayadores.

¡Y too esto en nome del «socialismu obreru»!.