La Constitución Española (artículos 23.2 y 103.3) establez un sistema d’accesu a la función pública y promoción dientro d’ella, sofitáu nos principios de publicidá, igualdá, méritu y capacidá, que les lleis de desendolcu concreten nos pasos que se resumen darréu: convocatoria pública de toles vacantes alministratives (seyan d’accesu o promoción) y establecimientu d’unos requisitos pa poder presentase a la convocatoria y d’unos méritos colos que puntuar la capacidá de los que lo faigan.
Al Conceyu de Cangas del Narcea abúlta-y que ye importante pal bon serviciu a la ciudadanía que la llingua del país seya parte nel procesu seleutivu d’accesu a la so almnistración y promoción nella, lo que ta dafechamente dientro de la mentada llegalidá constitucional. ¿Cómo va facelo?. Entá nun se conoz, pero bien pue ser plantegando la so conocencia como requisitu pal accesu a determinaos puestos (por exemplu los de la Oficina de Política Llingüística o los que tienen d’atender a los ciudadanos que escueyan la llingua asturiana pa empobinase a la so alministración local, drechu reconocíu pela llei) y como méritu pa otros, con más o menos puntuación según les peculiaridaes de los concretos puestos de trabayu. Too normal, correuto y constitucional.
Lo que nun ye normal, nin correuto, nin constitucional ye lo que vien faciendo l’Alministración del Principáu d’Asturies dende l’añu 2001, que nun ye otro que sustituyir los principios constitucionales de publicidá, igualdá, méritu y capacidá na promoción dientro de la función pública pola designación direuta pel deu de los políticos. ¿Como consiguió’l Gobiernu Areces llegar a esti estropiciu constitucional?. Pel fácil y restorcíu camín d’incumplir la llei per ocho años siguíos, pente medies de dos engataes: primera, la d’asitiar el 50% de los puestos de trabayu propios de titulaciones superiores como de llibre designación del poder políticu ensin valoración de méritu dalu; y, segunda pal 50% que queda, nun convocando los concursos de méritos nel plazu másimu llegal establecíu d’un añu colo que, al nun facelo, vese “obligáu” a recurrir al nomamientu en comisión de serviciu, pal que tampoco se valora nengún méritu por que se fai tamién direutamente a deu pol poder políticu.
La responsable d’esti vergonzosu desacatu constitucional ye, xustamente, la Conseyera d’Alministraciones Públiques y Vocera del Gobiernu, señora Migoya, la mesma que se pon a cacarexar escontra l’emplegu de la conocencia de la llingua propia como requisitu o méritu en concursos y oposiciones énte l’Ayuntamientu de Cangas del Narcea, aventándose a facer “alvertencies d’indole xurídicu y en materia de llegalidá”, mesmamente enantes de conocer l’alcuerdu del ayuntamientu al respeutu, nin mirar pa lo que tien ella en casa.
¿Qué-y pue reprochar braeramente la señora Migoya al Ayuntamientu de Cangas que nun seya el que nun siga’l so mal exemplu y universalice la promoción de los sos funcionarios ensin otru méritu que nun seya la confianza del políticu de turnu?.
¿Ye posible que puedan facese estes coses, a estes altures del sieglu nel que tamos y ensin que a naide-y caiga’l cargu y la cara de verguenza?.
Pues polo que se ve y se siente, n’Asturies ye posible.
No hay comentarios:
Publicar un comentario