Les cifres de los puestos a déu

Artículo de miembros de COFPA publicado en el Diario La Nueva España

Va pocos díes que cuatro centrales sindicales con representación mayoritaria na Xunta de Personal Funcionariu del Principáu d´Asturies denunciaben un descomunáu aumentu del númberu de puestos de llibre designación o a déu, como corrientemente seyos conoz.
Los portavoces sindicales talantaben qu´esti incrementu de los puestos de trabayu de confianza política taba frayando les condiciones d´imparcialidá imprescindibles pal desenvolvimientu d´un llabor respetuosu col interés xeneral, al ampar que afitaba una carrera profesional mui de los principios de igualdá, méritu y capacidá qu´impón la Constitución. Algún periódicu recoyó el datu de que los puestos déu nel Principáu superaben ya el 20 por cientu.
Pa salir de dudes y esclariar la cuestión nun se nos ocurre métodu meyor que tirar de les cifres espublizáes pol propiu Gobiernu autonómicu. Asina, na rellación de puestos de trabayu del personal funcionariu correspondiente a la pasada lexislatura (BOPA de 6 de marzu de 2007 ) – nun incluye al personal educativu, al sanitariu, nin al llaboral -, atopamos un total de 492 puestos de nomamientu dixital, demientres que na rellación de puestos de trabayu vixente ( ta acabante de espublizar nel BOPA de 16 de mayu d´esti añu) el númberu de plazes a déu ya sube a 550. Ye dicir, el datu obxetivu ye que crecieron en apenes un añu un 13 por cientu.
Pa valorar lo que supón esta cifra, tien que partise necesariamente del presupuestu de que pa la lley la llibre designación debe ser un procedimientu excepcional, estraordinariu, frente al concursu de méritos, que ye el sistema normal de nombramientu na función pública.
Siendo ello asina, en cuentes que na rellación de puestos de trabayu espublizada el 16 de mayu atópense un total de 2.086 puestos singularizáos, ye decir, d´ascensu na carrera profesional o de nivel superior a los puestos d´entrada o puestos base, los 550 provistos pol sistema del déu o de la confianza política suponen el 26,36 por cientu de los puestos d´ascensu pal personal funcionariu.
Con estos porcentaxes, ¿ pue dicise que la llibre designación ye, como exixe la lley, un sistema excepcional n´Alminsitración del Principáu d´Asturies?
Pero l´asuntu enrevésase bastante más si a lo expuestos añádese que la llegalidá tampoco se cumple con los puestos de trabayu a cubrir por concursu de méritos porque los concurso nun se convoquen nos plazos llegales. La lley diz que los puestos vacantes nun puen ocupase provisionalmente más d´un añu y que tienen que sacase a concursu n´esis plazu, pero na práutica les convocatories nun se facen y los nombramientos provisionales o en comisón de servicios duren dellos años. Cómo esto nomaientos provisionales fácense tamién pola vía dixital, alcontrámonos “de facto” con un sistema de carrera profesional vueltu del revés: el concurso de méritos ye la excepción y la llibre designación la regla xeneral.
Si esta ye la respuesta a la denuncia sindical, La pregunta nun pue ser otra qu´el clásicu qui prodest: ¿ a quien beneficia un sistema de carrera profesional na función pública asturiana sofitáu na confianza política?

Javier Álvarez Villa
Silvino Cordero Pando
Xurde Blanco Puente