La Llei 3/1986, de 26 d´avientu, d´Ordenación de la Función Pública Asturiana define al personal eventual como aquél que realiza funciones de confianza y asesoramientu de los cargos políticos. Esti personal nómase llibremente y cesa, en tou casu, cuando lo facen los conseyeros que los nomen. Son los funcionarios políticos de los gabinetes de les estremaes Conseyeríes.
La mesma Llei dispón nel artículo 30 que les relaciones de puestos de trabayu contendrán los puestos que puen ser desendolcaos por personal eventual, asina como qu´eses relaciones sedrán públiques.Pela parte de so, l´artículu 12 del Estatutu Básicu del Emplegáu Públicu (Llei 7/2007, de 12 d´abril) establez que'l númberu de los emplegaos eventuales y les sos condiciones retributives sedrán públiques.Estes disposiciones llegales incúmplense de manera sistemática y dafechu pol Gobiernu asturianu, qu´omite y, en consecuencia, tapa, en toles relaciones de puestos de trabayu qu´aprueba y espubliza nel Bolletín Oficial, la riestra de puestos reservaos al personal eventual, asina como les sos retribuciones.
Nun hai, polo tanto, xustificación llegal dala pa caltener na clandestinidá la llista de puestos de personal eventual y los nomamientos y retribuciones correspondientes a esos puestos. Nesi sen, l'espardimientu reciente pela rede interna de l´Alministración asturiana de la relación de funcionarios eventuales al traviés d´un correu masivu involuntariu, allumó, d´un mou ridículu y prestosu, l´apagón intencionáu del Gobiernu.Pa afitar el cumplimientu de la Llei , el Conceyu por Otra Función Pública n´Asturies anuncia la presentación inmediata de les aiciones llegales afayadizes empobináes a obligar al Gobiernu asturianu a incorporar los puestos del personal eventual y les sos retribuciones a les relaciones públiques de puestos de trabayu.
Porque otra Función Pública n´Asturies nun sólo ye posible, si non que ye una urxente desixencia democrática.
Uviéu, 30 de payares de 2008
Po la Xunta Xestora del Conceyu por Otra Función Pública n´Asturies
Xabiel Alvarez Villa
No hay comentarios:
Publicar un comentario