Intervención del Conceyu por Otra Función Pública n´Asturies en la Junta General del Principado

Intervención del Conceyu por Otra Función Pública n´Asturies en la sesión informativa celebrada el día 16 de diciembre en la Junta General del Principado, sobre el Proyecto de Ley de reforma de la Ley de Función Pública asturiana:

"Bones tardes. Soi José María Estrada Janáriz, miembru del Conceyu por Otra Función Pública n´Asturies. De primeres, quiero da-yos les gracies a los grupos parllamentarios de Foro Asturies y del Partíu Popular pol convite pa intervenir nesti actu. Y póngome a ello.

29 de setiembre del 2001. Fecha d’asoleyadura nel BOPA del últimu concursu de méritos válidamente resueltu pola Alministración del Principáu d'Asturies pa cubrir puestos de xefatures de seición reservaes a funcionarios con titulación superior, lletraos del Serviciu Xurídicu ya inspectores de la Inspeición Xeneral de Servicios.

Pasaron yá más de doce años dende aquella fecha, ensin qu’hubiere nengún concursu de méritos posterior válidamente resueltu pa esti tipu de puestos, periodu nel que puen contase por centenares los puestos vacantes cubiertos pente medies de comisiones de servicios. D'esta miente, lo que per llei tien de ser en sistema esceicional de nomamientos por razones d'urxente y estraordinaria necesidá, convertióse nel Principáu d'Asturies nel procedimientu normal de cobertoria d'estes  vacantes, alteriando dafechamente los mecanismos llegales de promoción profesional de los funcionarios. Col agravante de que les comisiones de servicios son llibres designaciones «de facto», pues nin se someten a convocatoria pública, nin se respeta mínimamente un procedimientu que garantice los principios d'igualdá, méritu y capacidá.

Y esto de xuru que va siguir asina, pues con fecha de 10 del mes qu’andamos, el Xulgáu de lo contencioso-alministrativu nº 5 d’Uviéu declaro nulu’l resolvimientu de 23 de mayu del 2013, de convocatoria de concursu de méritos pa provisión d’estremaos puestos de trabayu.

26 de febreru del 2011. Fecha d’asoleyadura nel BOPA de la última convocatoria de concursu de méritos pa cubrir puestos de xefatures de negociáu reservaos a auxiliares alministrativos y a alministrativos -, dempués de l'anulación en vía xudicial de los dos convocatories anteriores. Cuando trescurrieron  yá casi tres años dende la publicación d'esta última convocatoria, la mesma sigue ensin resolvese y va camín de bater el record mundial de tardancia na tramitación alministrativa d'un concursu de méritos (mentanto, toles places convocaes, dellos centenares, siguen cubiertes añu tres añu en comisión de servicios)

Con estos dos exemplos queremos facer rescamplar que la metástasis que carez el sistema de provisión de puestos de trabayu nel Principáu d'Asturies, nun ye tanto un problema de la llei de función pública, como de l'aplicación – o meyor dicho, non aplicación – que se fixo y vien faciéndose de la llei dende bastantes años p’atrás.

Equí lo que verdaderamente tien de camudase ye una mentalidá y unes práutiques políticu – alministratives que vinieron poniendo los criterios d'enfotu y amistá (personal, política etc.) per delantre de los principios constitucionales d'igualdá, méritu y capacidá)

Y esa reflexón en fondura que dexe allugar esperances de que se van abandonar los vezos, práutiques y conductes clientelistes nel ascensu o carrera profesional de los emplegaos públicos nel Principáu d'Asturies, échase totalmente en falta nel proyectu de llei qu'agora s'alderica nesta Xunta, polo qu'enforma tarrecemos que, a última hora, respuenda, «mutatis mutandi» a aquella máxima de Giuseppe Tomasi di Lampedusa de «Si queremos que todo siga como está, es necesario que todo cambie»

Porque, señoríes, la Llei de Función Pública de 1985 – la primera de l'autonomía – yera un testu llegal bien construyíu y respetuosu con un sistema de provisión de los puestos de trabayu oxetivu, profesional y ayenu al amiguismu y al enchufismu: concursu de méritos, como sistema ordinariu, llibre designación esceicional, comisión de servicios por un plazu máximu d'un añu, obligación de convocatoria pública añal de los puestos vacantes etc.

Lo que frayó esti sistema llegal y convertiolu en papel moyáu foi una práutica político – alministrativa que tresformó los sistemes esceicionales de nomamientu na regla xeneral, col envís de facilitar una xestión de la carrera vertical más axilosa, pero tamién sometida a intereses ayenos a los de la llegalidá na promoción profesional nel empelgu públicu.

Agora'l Gobiernu trai equí un proyectu de llei de reforma de la llei de función pública, nel que na so esposición de motivos dizse, lliteral: «De esta forma la legislación del Principado de Asturias se ajusta plenamente a la

jurisprudencia consolidada en esta materia». Por embargu, el proyeutu dexa intautos los principales preseos pa los nomamientos a deu. (Equí quiero facer un paréntesis pa que se note como al autor d’esti testu traiconolu’l subsconciente y déxanos enforma claro que esi «ajustarse plenamente» ta lloñe de ser voluntariu y rápidu, pues fáise tres de «jurisprudencia consolidada»)

Esti proyéutu, digo, per un llau, caltién intautu'l procedimientu de nomamientos en comisión de serviciu, col plazu máximu de dos años de duración y la discrecionalidad total y absoluta pa la eleición del nomáu, lo que, na práutica, supón caltener un sistema xeneralizáu de llibre designación «de facto». Nun fai falta amestar, qu’esti sistema contradizse dafechamente con esa supuesta voluntá d'enmienda qu'aparentemente tendría'l Gobiernu pa la promoción del personal según los criterios oxetivos qu’esixe la llei.

Y d'otru llau, cola introducción claramente tendenciosa de la figura del direutivu profesional, cola que se caltién per otra vía la llibre designación actual de los puestos más relevantes, pero col grave agregu que supón el fechu de que nin siquiera tengan que ser emplegaos públicos. Esplicámonos.

La figura del direutivu profesional naz y llántase n'otros países, coles mires d'introducir téuniques xerenciales de xestión privada na Alministración Pública, que supuestamente diríen nuna mayor eficacia y eficiencia na xestión de lo público. Tien sentíu, principalmente, n'Alministraciones fuertemente desconcentraes, como la inglesa o la norteamericana, organizaes al traviés d'axencies, con una gran autonomía financiera, contractual, de xestión de personal etc., al frente de les cuáles asítiase a personal direutivo, qu'actua con autonomía al respeutive de la clas política que lu noma y énte la que da cuentes.

Pero'l proyeutu de llei qu'agora se trai a la Xunta Xeneral nun va per esta llinia. Lo que fai nun ye otra cosa que llantar una estructura direutiva tresversal, intercalada ente los direutores xenerales – cargos políticos – y los xefes de serviciu, que na práctica va desenvolver una bona parte de les funciones que veníen desempeñando los xefes de serviciu, les cuáles tan venceyaes al exerciciu de potestaes públiques y que, per llei, tendríen de quedar reservaes a funcionarios.

L'artículu 9. 2 de la Llei 7/2007, de 12 d'abril, del Estatutu Básicu del Emplegáu Públicu dispón que “el ejercicio de las funciones que impliquen la participación directa o indirecta en el ejercicio de las potestades públicas o en la salvaguardia de los intereses generales del Estado y de las Administraciones Públicas corresponden exclusivamente a los funcionarios públicos, en los términos que en la ley de desarrollo de cada Administración Pública se establezca”

Paez evidente que si lo que se quier ye crear una estructura tresversal de puestos direutivos dientro de l'Alministración asturiana, (que'l so númberu pode llegar a doblar, nin más nin menos, el de Direutores Xenerales), les sos funciones van implicar una participación direuta o indireuta nel exerciciu de potestaes públiques y a incidir abiertamente sobre los intereses xenerales de la Comunidá Autónoma; potestaes públiques que per llei namás que podríen desempeñar los funcionarios públicos.

Pero ye'l casu que'l proyectu de llei nun esixe como requisitu pa ser nomáu personal direutivu'l tener la condición d'emplegáu públicu. Si esto ye asina, y de la llectura del proyectu de llei asina paez deducise, el pasu p’atrás nes condiciones d'imparcialidá pal desempeñu de les funciones públiques nesti tipu de puestos ye tremendu. Como se ve, nesti puntu, el nuestro analís estrémase del que ficieron los sindicatos que intervinieron enantes. Nosotros, a la vista de la redaición calculadamente confusa que se-y va dar al artíuclu 3 de la Llei del Principáu d’Asturies 3/1985, de 26 d’avientu, d’Ordenación de la función pública (per un lláu, el personal direutivu nun apaez ente les categoríes d’emplegaos públicos, pero, por otru, dizse que «Es personal directivo el empleado público..) creemos qu’esta ye la vía pa qu’entren a exercer potestaes públiques, de forma dafechamente illegal, persones ayenes a la función pública.

Pero, amás, y yá voi terminando, si se diz que'l procedimientu de llibre designación pode contaminar políticamente la designación de funcionarios públicos y afeuta a les sos condiciones d'imparcialidá y por eso refúgase pal nomamientu de xefes de serviciu, ¿por qué motivu nun va causar les mesmes consecuencies na seleición del personal direutivu?, ¿cómo se va garantizar que la llibre designación de direutivos nun termine siendo un puru y simple procesu de nomamientos a deu, como agora asocede cola llibre designación de funcionarios?

Esti proyectu de llei nun va na direición de facer más profesional al emplegu públicu y de facer oxetivu’l sistema de nomamientos pal ascensu na carrera profesional, sinón más bien a caltener l'actual sistema con otros nomes. Por ello, dende'l Conceyu por Otra Función Pública n´Asturies consideramos que tien de ser refugáu"